عـر.بـي -
أولياء أمور رياض أطفال القاهرة والجيزة هام بخصوص أخر كلام فى التنسيق
توضيح مهم :
لما وزير التعليم قال هيتم تسكين الأطفال من ٥ سنوات إلى ما فوق في الجيزة وهيزود القاعات وهيعمل فترتين ده كان حل فعلا للجيزة فقط مش عارفه القاهرة زعلانين ليه هوضح لكم ايه النظام في القاهرة والجيزة
★القاهرة الأول بتقدم لابنك ومن بعد نتيجة اول تنسيق الادارات بتعلن الحد الأدنى لتنسيقها ومش بتنزل عنه تاني يعني القاهرة لها تنسيق واحد فقط واللي بيحصل بعدها ده كله اسمه حصر أماكن وإعادة توزيع يعني حتى لو القاهره قعد الف تنسيق مش تلاته او اربعه هيبقى بنفس الحد الأدني للتنسيق الاول الفرق ان بيعيدوا توزيع الولاد حسب الاماكن الفارغه والكثافه وبيبقى من الأول والأخر سوء اختيار من ولي الأمر رايح يسجل ابنه في مدرسة معروف انها ذات كثافه عاليه وطبيعي الحد الأدني بيكون عالي فيها ده غير ان القاهرة في بعض الإدارات ممكن تلاقي في نفس الإدارة حوالي ٦ و٧ مدارس تجريبي زي حدائق القبه مثلا وكل مدرسة لها تنسيق بس لازم يكون على الأقل في نفس الإدارة في مدرسة او اكتر وقف تنسيقها عند ٥ سنوات ونادر تلاقي ادارة السن منزلش لخمسه بالظبط وهما اداراتين فقط تقريبا وبيتم توزيع الأطفال على ادارات قريبه ده غير ان القاهرة فيها تقريبا في كل إداره أو إدارتين جنب بعض مدرسة متميزه (فيوتشر) ....
الكلام اللي بقوله على القاهرة ينطبق على كل محافظات الجمهوريه باستثناء النقطه الخاصه بعدد المدارس لأن القاهرة تتميز بكثرة عدد المدارس التجريبي والمتميز (الفيوتشر)
★طيب ايه حكايه الجيزة ...الجيزة حكايتها منيله بنيله أه والله سيادة الوزير وقت تطبيق النظام التعليمي الجديد قال العالم كله بيتفرج علينا أهو الجيزة دي لو العالم كله ركز شويه في تنسيقها هيتفرج علينا ويضحك ويتريق كمان ويقول هما بتوع التنسيق مبهدلين الناس معاهم كده ليه شوف معايا يا سيدي
أولا كوكتيل تنسيقات يعني ١٠ تنسيقات وكل تنسيق غير التاني وبينزل بالسحتوت وعذاب ما بعده عذاب وفي نفس الادارة ابنك سنه مش مناسب في ولا مدرسة واحده
وكان لازم طالما انت من سكان الجيزة وخصوصا إدارة الهرم أوالدقي او شمال تفكر كويس قبل ما تخلف او احسب ان سن ابنك يكون مثلا ٥ و١١ و٢٩ يوم اه بجد احسبوها اوي دي نقطة مهمه.
النقطة التانيه مافيش مدارس كافية لاستيعاب الأعداد المتقدمه يعني إدارة الهرم بالكثافه دي كلها مافيهاش غير ثلاث مدارس تجريبي لكن تلاقي واحده في أخر فيصل وواحده في المريوطية عند المجزر الآلي وواحده في هضبه الأهرام والإسم تابعين لإدارة الهرم يعني مش فاهمه ازاي كده وكل تنسيق ولي الأمر حاطط ايده على قلبه لأن التنسيق مجهول مش عارف ابنه اسمه هينزل او لأ
والمفاجأة ان الجيزة دي كلها مافيهاش الا ٦ مدارس متميزة واحده في العمرانية وواحده في المنيب والأربعه في أكتوبر
المهم علشان طولت عليكم الجيزة حتى الآن بكل إداراتها الموقره والمحترمه مافيش إدارة واحدة تنسيقها نزل ل٥ سنوات
عرفتوا الفرق ولا لسه طبعا مافيش وجه مقارنه نهائي نهائي بين الجيزة والقاهرة لأن القاهرة محافظة منظمه عارفه بتعمل ايه أما الجيزة مش عارفين لها راس من رجلين حتى الآن ٧ تنسيقات ومافيش اداراه واحده خدت ٥ سنين ده غير مساحه المدارس المخنوقه والضيقه ومافيش فصول والعيال متشحططين في ملحقات وكراڤانات خارج مدارسهم .يعني عندكم مثل لمدرسة المعرفه انت مقدم رياض أطفال مدرسة المعرفه لكن ابنك قاعد في ملحقه بمدرسة كفر نصار الحكومي مستلفين منهم فصلين وهكذا مافيش اهتمام في الجيزة أبدا أبدا بالتعليم التجريبي والحكومي الاهتمام كله منصب على المدارس الخاصه وتجارة المدارس الخاصة .
بس خلاص وخلصت الحدوته يارب أكون قدرت أوصل لكم الفكرة واتمنى ان تصريح الوزير يكون بدايه الاهتمام بالتعليم في الجيزة
وبالتوفيق للجميع إن شاء الله
أولياء أمور رياض أطفال القاهرة والجيزة هام بخصوص أخر كلام فى التنسيق تم اضافه الموضوع بواسطة 3ar.be
موقع عربي- هذا الموضوع منقول من موقع (سنتر التعليمي) للوصول الى المصدر اضغط هــنــا
ليست هناك تعليقات